前2日坐小巴, 有個亞婆上車, 佢真係行動非常困難, 上車要用埋對手爬上黎, 我見到佢咁辛苦, 立即上前扶佢上車坐好.

過左一陣, 亞婆問司機, 我想去xxx, 你到左叫我落車啦, 但司機都唔知佢想去邊度, 亞婆拎住張飛比司機睇, 司機話你張飛無地址, 我都唔知, 司機叔叔都好好人, 好大聲讀張飛, 青衣xxx 老人中心, 有無人知係邊度? 但全車都無人知, 結果快要過青衣橋, 司機話呢架車就快要過橋去葵涌, 你落左車問人啦. 

亞婆好無奈都要落車, 我又見佢上車都咁困難, 落車一定仲麻煩, 立即起身落車扶亞婆落黎, 等佢企穩, 我立即上番車, 至於亞婆有無搵到間老人中心, 真係唔知道啦.

我坐低一陣, 聽到有人細細聲講: 呢位小姐真係好心. 我聽到開心左一陣, 但鼻子一酸, 心裡面想, 我mami都係行動不便, 上落車都要人扶住, 驚佢又再跌親, 老人家跌親會好大件事, 我mami自己唔敢一個人坐車出街, 一定有我陪住. 點解呢位婆婆咁大膽唔識路都一個人坐車去街, 如果我第日老左好似呢位亞婆咁, 都希望有人幫下我

arrow
arrow
    全站熱搜

    dincat 發表在 痞客邦 留言(1) 人氣()