癲貓SHOW

今日係農曆二月初一, 解禁啦！

老媽子係舊一代人, 好多野都古老思想, 新正頭好多野都話要禁, 雖然我唔信, 但有d我都會跟佢, 唔做住囉.

佢話正月唔好買鞋, 之前我間中有幾年忍唔到, 在正月買左鞋, 佢記得果年就唔好, 有一年我老豆仲叮埋添, 可能係有咁啱卦, 但佢舊年年尾特登提醒我, 唔准我買,  今年我都無買啦, 遲d買又唔洗死, 順下佢囉.

最麻煩就係逢初一、十五唔准洗頭, 有時朝早起身, 洗完頭都唔知幾舒服.
媽:今日初一喎你洗頭?! 
me:車....我鬼知今日係初一咩, 我都無睇舊曆. 
媽:初一、十五唔好洗頭呀
me:係咩? 通勝都無話唔好洗頭, 都洗左啦.
嘻嘻,  久而久之, 佢都無氣再話我.

呢樣都未算呀, 以前至慘係正月未過人日, 都話唔洗得, 我都唔知我細個時候點忍到咁多日唔洗頭(佢係由貼左揮春起計到人日都唔准洗頭, 差不多有10日), 後來稍為有判斷力, 我都偷偷趁佢出左街洗頭吹乾埋, 佢都未知. 

乜又唔得, 物又唔得, 邊跟得咁多, 結果我無理佢, 犯規太多都無我符, 由得我. 

仲有舊年我過左尾禡都無去剪髮, 又唔份氣比人收雙倍錢, 無剪髮就過年, 結果等到而家, 開始夏天又到, 我要快d去剪.